Proiektuak

Mahaia Kolektiboa

Mahaia Kolektiboa hamasei sukaldarik osatzen dute, belaunaldi hibrido bateko seme-alabak eta dagoeneko Euskadin zein kanpoan aintzatespen nabarmena duteak denak. Aurrerapauso bat eman nahi izan duten sukaldarien belaunaldi baten parte dira, elkarlanean, lagunduz eta guztien onaren zerbitzura aritzeko.

Aitor Arregi

Aitor Arregi Elkano jatetxeako sukaldaria da. Bere aita Pedrori “errebolloaren errege” deitzen zioten, eta semeak indarrez heldu dio oinordekoaren lekukoari. Familia taberna batean hasi zena, azkar bilakatu zen arrainen erretegi entzutetsua, teknika berriak erabiliz. Gaur egun Michelin izar bat dauka, eta Getariako jatetxe ezagunenetakoa da.

Jon Ayala

Jon Ayala Hondarribiko Laia erretegiko jabea da Arantza arrebarekin batera. Parrillan maisua eta haragi heltzen prozesuan espezialista da (Dry Age Beef). Erretegiko sukaldea gidatzen du eta 2015ean San Sebastián Gastronomikako Parrilla txapelketa irabazi zuen.

Enrique Fleischmann

Bailaran Enrique Fleischmanek su artean izandako ibilbidearen eta gastronomiarekiko pasioaren emaitza da. Euskal lurrarekin maitemindu zen sukaldari mexikar honen historia islatzen duen sukaldaritza, bere bizipenetan oinarritua. Plateretan ezin hobeto uztartzen ditu tradizioa eta abangoardia.

Ander González

Ander Gonzalez txikitatik ibili da marmiten artean. Konstituzio plazako Astelena taberna zaharrekoak izan ziren lehenak. Luis Irizar sukaldaritza eskolan ikasi ondoren, 1997. urtetik jatetxeko lana bateratzen du telebista aurkezle, Basque Culinary Centerreko irakasle eta Lasala Plaza Hoteleko aholkulari gastronomiko zereginekin.

Xabi Gorrotxategi

1950eko hamarkadan ateak zabaldu zituen Casa Julián erretegi ezagunak, parrillan egindako haragiaren mundu mailako erreferenteetako bat da. Matias Gorrotxategi aitak erretiroa hartu ondoren, haren ardura hartu zuen Xabi Gorrotxategik. Aitarengandik ikasi zuen parrillaren teknika eta 60 urtetik gora dituen batean egiten ditu piperrak eta txuletak.

Ismael Iglesias

Luis Irizar sukaldaritza eskolan ikasi zuen eta hori Donostiako sukalde onenetako batzuetan sartzeko oinarri izan zen: Urepel, Narru eta Astelehena 1997, besteak beste. Lau urtez Kata-4 jatetxeko sukaldeburu izan ondoren, bere jatetxe propio ireki zuen 2017an: Rita. Berak bezala Gaztelako ukituak eta bihotz donostiarra duen tokia.

Dani López

Daniel Lopezek 17 urterekin ekin zion bere ibilbideari Luiz Irizar sukaldaritza eskola ospetsuan. Lehen urte haietan Donostiako jatetxe onenetan lan egin zuen, hala nola, Arzak, Akelarre, Panier Fleury edo Casa Nicolasa. Ondoren etorri ziren Benalmadenako Alay, Ignacio Muguruzaren Mar de Alborán eta Marbellako Santiago eta El Portalón. 2002an etxera bueltatu eta Kokotxa izeneko jatetxea irekitzea erabaki zuen, bost urteren buruan Michelin izar bat eman zioten.

Iñigo Lavado

Sukaldaritza du pasio Iñigo Lavadok, erronkek hunkitu egiten dute eta zenbait proiektutan murgilduta bizi da. Martin Berasategi, Ferrán Adriá, Pedro Subijana, Alain Ducasse eta Luis Irizar sukaldari handiekin sutautsak partekatu ditu eta 2000. urteaz geroztik, Irungo Ficoba erakustazokan bere jatetxea zuzentzen du. Proposamen gastronomiko harrigarria eskaintzen du espazio bero eta original batean.

Pablo Loureiro

Ostalari tradizioko sukaldaria, bere aitonak sortu eta gurasoek zuzendutako Donostiarra jatetxean hasi zen lanean. Geroago, Branka jatetxeko sukaldearen ardura hartu zuen eta Donostiako gastronomiaren erreferente bihurtu zen. Jatetxe propioa zuzendu eta euskal sukaldaritza tradizionalaren ikuspegia garatzeko kezkak bultzatuta, 2012an Urola hartu zuen. 2019an Jatetxe jabe onenari Euskadi Gastronomia Saria jaso zuen.

Pili Manterola

Iribar jatetxea Getariako portu ondoan dago. Pili Manterola sukaldariak negozioa abiatu zuen bere aitonaren lanarekin jarraitu du eta euskal sukaldaritza tradizionaleko platerak eskaintzen ditu. Aitonak eta aitak bezala, sua DNAn darama Manterolak eta parrillan egindako arrainak nabarmentzen dira itsasoko jakiak nagusi diren kartan.

Aizpea Oihaneder

Donostiako Sukaldaritza Eskolan ikasketak amaitu ondoren, nazioarteko sukaldari handiekin trebatu zen: Juan Mari Arzak, Martín Berasategui, Santi Santamaria edo Michel Bras. Xabier Diezekin batera, ospe handiko hainbat jatetxetako sukaldeak zuzendu ditu, hala nola, Monasterio Rocamador, Michelin izar bat lortu zuen bertan. 2008an Xarma jatetxea ireki zuten. Hamarkada luzeko ibilbidearen ondoren hura itxi eta Xama Cook & Culture zabaldu zuten.

Xabier Díez

Oñatiko Sukaldaritza Eskolan ikasketak bukatuta, Bodegon Alejandro, Iturritxo edota Arzaken hasi zuen bere ibilbidea. Aizpea Oihanederrekin batera, hainbat jatetxe ezagunetako sukaldeen ardura izan du, besteak beste, Monasterio Rocamador, Michelin izar bat lortu zuten bertan.2008an Xarma jatetxea ireki zuten. Hamarkada luzeko ibilbidearen ondoren hura itxi eta Xama Cook & Culture zabaldu zuten.

Roberto Ruiz

Roberto Ruiz sukaldari ezaguna da euskal sukaldaritzaren kulturan. Tolosako Frontón jatetxean egindako ibilbide luzearen ondoren, Hika bodegan sartu da bere taldearekin batera gastronomiko proiektua gidatzeko. Ernio mendira ikuspegi zoragarriak dituen gunea da, sukaldaritza eta tratu atseginekoa.

Ruben Trincado

Sukaldari artean hazteak markatu du Ruben Trincadoren sukaldaritzarekiko zaletasuna. Amona Faustina Zalduak eta Mitxel eta Mari Carmen gurasoek gastronomiarekiko grina eta jakin-mina piztu zioten. Mirador de Ulia zuzentzen duen hirugarren belaunaldia da. Ibilbidean, ordea, Kokotxa, Bodegon Alejandro eta Abarkatik pasatu da, eta ikasten jarraitu zuen Parisko La Perousen edo Ginebrako Labotan. Martin Berasategi-Alcorta saria irabazi zuen 2006an, bi Repsol eguzki eta Michelin izar bat du.

Igor Arregi

Igor Arregi Kaia-Kaipe jatetxeko jangela zuzendaria eta sommelierra da, haren ardura duen hirugarren belaunaldia da. Luis Irizarren eskolan eta Kaia-Kaipeko su artean ikasi zuen ogibidea, bertan lan egiten baitu 14 urte zituenetik. 2013an jangela zuzendari onenari Euskadi Gastronomia Saria irabazi zuen.

Gorka Txapartegi

Lapiko artean hazi zen Gorka Txapartegi eta horrek sukaldaritzarekiko gogoa eta errezetekiko jakin-mina piztu zion. Azken 70 urtetan Hondaribiko Alameda jatetxea zuzendu duen familiaren hirugarren belaunaldia da. 1997an Michelin izar bat lortu zuen, hainbat lekutan izan ondoren, Osakatik Portora, New Yorketik igaroz.

Paul Arrillaga

Maite Mujikarekin batera, Paul Arrillagak zuzentzen du Donostiako San Telmo Museoaren egoitzan dagoen Zazpi jatetxea. San Martzial kalean 7 urte igaro ostean, 2021ean jauzi bat ematea erabaki zuten, taberna zaharraren izpiritua mantenduz eta eskaintza gastronomikoa berrituz. Izena eman zieten pintxoez gain, jatetxe zerbitzua eta ardo-karta bikaina eskaintzen dute egun.

Javier Rivero eta Gorka Rico

Tolosa aldean, lurrarekin eta bertako produktuarekin konprometituta bizi dira Javi Rivero eta Gorka Rico —Basque Culinary Centerreko ikasle ohiak, eta berriki Madrid Fusión Lehiaketaren XXI. edizioko Sukaldari Berri Onenak izendatuak—. Inguruko elikagaiak eta hornitzaileak goraipatzeko ekinean ari dira beren AMA proposamenean, eta dagoeneko lortu dute Repsol eguzki bat. Inguruotako erakusleiho gisa sortutako jatetxe txiki bikain bat.

Iñigo Peña

Iñigo Peñak Gipuzkoako hiriburuko eskaintza gastronomiko osoenetako bat eskaintzen du gaur egun Narru jatetxean. Garai batera begiratu, gure arbasoengandik ikasi eta euskal esentzian arakatzen du Peñak. Hala, tradizioa arnasten den leku bat sortu du, baina haren eskaintza gastronomikoak espiritu gaztea, informala, eraginkorra eta garaikidea islatzen du.

Juan Carlos Caro

Produktua, soiltasuna, hurbiltasuna eta maitasuna; izan sutegian, egur-labean edo parrillan. Horixe espero daiteke Juan Carlos Carorengandik. Santi Santamaríaren eta Pedro Subijanaren ikasle izan zenak lan bikaina egin du aspaldidanik Zelai Txikin, eta hainbat aintzatespen jaso ditu, hala nola 2022ko Izar Berdea (gastronomia jasangarriarekin konpromiso handiena duten jatetxeentzako errekonozimendu bat).