Sagardogilea
Amezketa, 1957
Ataungo ‘Urbitarte’ sagardotegia kudeatzen du Ixiar Irastorza emaztearekin batera. Aitzindaria dugu Terradillos sagardoen kriantzak egiten. Gaur egun hainbat elaborazio ditu, hala nola apardunak edo sagardo lupulatuak.
Sasoi batean fresatzeko mekanikari lanetan aritu zen, baina gaur egun sagardogiletzat dauka bere burua. Izan ere, izugarri gustatzen zaio sagardoa egitea. Baita arraina eta haragia sagardotegiko parrillan erretzea ere.
Sagar muztio hartzitu preziatua egiten hasi zen zaletasun gisa 1991. urtean. “Hasieran, nire ideia lau kupel txikitan 30 mila litro ekoiztea izan zen”, gogoratu du. Hala, zaletasun gisa hasi zen jarduera bere ogibide bilakatu da denboraren poderioz, eta Terradillos bera erreferente bihurtu da ekoizten autore edari klasikoa.
Bere lehenengo hamarkadan bikoteak aldi berean konbinatzen zituen Urbitarteko negozioa, Lizarrustiko aterpetxea eta Ordiziako kafetegia. “Urte oso gogorrak izan ziren, baina oso gustura egiten genuen”, onartu dute.
Sagardotegiari dagokionez, “hasieran sagardo arrunta egiten hasi ginen, eta beti izan dut buruan bertako produktuak erabiltzea. Mikel Zeberioren laguntzarekin hasi ginen beste modu batera sagardoa egiten”. 2004. urtea zen hura, hain zuzen ere.
“Hasieran mota guztietako sagarrekin ekoizten genuen, eta gero monobarietalei ekin genien. Halaber, bilakaera izan dugu sagarrak biltzeko eran, aldatzen joan baikara: zuzenean zuhaitzetik jasotzen dugu orain, kixkirik erabili gabe -lurretik sagarra biltzeko tresna tradizionala-. Horren ondorioz fruitua ez da herdoiltzen prozesuan. Hori izan zen kriantza sagardoak egiteko erronkaren hastapenak”, gogoratu du.
Era berean, erabaki zuten zenbait elaboraziotarako bakarrik erabiltzea azaroan bildutako sagarra, alegia, ‘Errezil’ eta ‘Urtebide’ barietateetako denboraldi amaierako sagarrak. “Uste dut gaur egun puntu egokia lortu dugula”, dio gipuzkoarrak. Uneotan sagarra eskuratzeko lekuak honakoak dituzte: Gabiria, Olaberria eta 18 kilometro luze den Ataun bezalako inguruko herriak.
Gastronomia-munduak bere eskaintza nola ikusten duen galdetuta, “gehienek baloratzen dute egiten dugun produktua. Horrelako joera baitago platerak eta edariak uztartzearen barruan sartzen diren jatetxe gastronomikoetan”, azaldu du.
Irakurriz eta informazio espezializatua erabiliz ikasi du sagardogintza amezketarrak. Bere aburuz, garbiketa izan da funtsezko prozesua sagardoaren azken hogei urteotan. Baita upelen desinfekzioa ere. “Hori da jarraitu beharreko bidea”, zehaztu du.
Hala, Terradillosek beharrezko ikusten du jendartea “kulturizatzea”, jatetxeek hainbat sagardo eskain ditzaten, ardoen karta eskuragai dagoen bezala. “Horrek esango du jendeak zein irizpide duen bata edo bestea aukeratzeko”.
