Nekazaria eta abeltzaina
Gasteiz, 1974
Hainbat proiektu kudeatzen ditu, hala nola, ‘Basatxerri’ zerri, ‘Lumagorri’ oilo-etxalde bana eta landare-mintegia. UAGA Arabako Nekazaritza eta Abeltzaintza Elkartea sindikatuarekin ere kolaboratzen du, ‘Basatxerri’ zigiluko artezkaritza kontseiluan parte hartzeaz gain.
Hastapenak ongi gogoratzen ditu arabarrak: “Gasteiztik zazpi kilometrora dagoen herri batekoa naiz. Familiak beti izan du lotura handia nekazaritzarekin, aitak eta aitonak lanbide horretan jardun baitzuten. Nik ez nuen interes handirik, beste gauza batzuk egin nahi nituelako, baina bizitzak ez dakizu nora zaramatzan, eta pixkanaka mundu honetan sartu ginen, nire senarrak nekazaritzarekiko interesa zela medio. Eta gaur egungoa izatera iritsi gara”.
Honez gain, Basterrak azpimarratu du emakume askorik ez dagoela horrelako proiektuetan murgildurik: “Leku askotatik deitzen didate eta zaila egiten zait ezetz esatea”. Hala ere, ikasketak bere bizitzaren parte izan dira: “Prestakuntza behar duzu, bestela ezinezkoa da gauzak ondo ateratzea”.
Horretaz guztiaz gain, bere leloa beti izan da ikasgai bakoitzean sakontzea ikaskuntzaren bidetik. Baita aurkitutako jendearekin ere.
UAGAri buruz egindako hausnarketei dagokienez, gasteiztarrak dio sindikatuak lanbidearen alde “gehiago borrokatzea” gustatuko litzaiokeela: “Gipuzkoan egiten den bezala, baina politiken alde egiten ari dira, helburu nagusia den borroka sindikala alde batera utzita. Gu pixka bat ‘bazterrak nahasteko’ sartu gara, baina proiektua aurrera ateratzea da nahi duguna edo egoera ordenatzea. Eta hori ez du jendeak normalean gustuko”.
Bere produktuak ostalaritza-sektorean nola funtzionatzen duen aztertuta, gaineratu du bai ‘Lumagorri’, bai ‘Basatxerri’ kalitate handikoak direla: “Kontu handiz aire librean haztearen plusa dutelako, eta pentsu espezifiko batez elikatzen ditugulako. Agian erosteko aukera handiagoa duten pertsonei zuzenduta dago eta salmenta zailagoa da”.
Hori aitortzen du Basterrak, “baina probatzen duten eta gustatzen zaien jendearen artean, ia lehiakiderik ez duen produktua da. Dastatzen duenak errepikatzen eta baloratzen du”.
Hobekuntzei dagokienez, argudiatu du bertako produktuei laguntzearekin batera etorriko direla: “Hemengo produktua gehiago sustatu beharko litzateke, baina egia da prezioa gainerakoena baino handiagoa dela”.
Amaitzeko, Arabako abeltzainak adierazi duenez, “negozioaren egonkortasuna” du helburu, beti ere, noski, gauzak ondo egiteko oinarriok mantenduta.
