Okina
Untzaga, 1968
‘Berteiz’ eta ‘Mendiondo’ okindegiak kudeatzen ditu, Mungian (Bizkaia) eta Gernikan (Bizkaia), hurrenez hurren. Ogi ona egitearen alde aritzen da ‘Euskal Ogia’ elkartean.
Oriberen bidea ogi-munduan lagun baten bitartez hasi zen, negozioa zuzentzen lagundu eta gero: “Ezagun batzuei esker, okindegi bat antolatu behar izan nuen 10 urtez, administrazio-zuzendari gisa. Zorionez edo zoritxarrez, enpresaren jabe egitea eskaini zidaten, eta jarduerarekin jarraitu dut”.
Atzera begiratu du bizkaitarrak produktu honen bilakaerari dagokionez: “Okindegiko bulegoan lan egiten nuenean, irinaren prezioa bakarrik galdetzen genuen, kalitatea baloratu gabe. Orain, berriz, fitxa teknikoak eskatzen ditugu, eta pixkanaka hainbat gauza aurkitzen ari gara”.
Izan ere, erronkak badituzte, horien artean, honakoa: maila organoleptikoan beste kalitate batzuetako gariak ereiten ari diren nekazariei laguntzea. “Masa irregularragoak daude, gari batzuek okindegi-ezaugarri gutxiago dituztelako. Zaila da hura hobetzea, baina kanpainaz kanpaina lortzen ari gara bertako garia hobea izatea. Araban, adibidez, pentsuetarako da ereindako gehiena, baina irinaren kalitatea handitzen ari gara, gari hobeak aurkituta”, dio Uribek.
Okinak aldarrikatzen du ogia ezin dela mahaian falta, gastronomia-munduan ahaztu ez dadin. Horrela sortu zen ‘Euskal Ogia’, xede nagusiarekin: industria-negozioetan zein denda txikietan sektorea bultzatzea. “Asmoa kalitate oneko ogi estandarra izatea da, enpresa txiki eta handietan lan egiteko modu berdinekin. ‘Euskal Ogia’ zigiluak, batez ere, ogiari nolabaiteko kalitatea eman nahi dio, produktu kimikoak ezabatzen dituzten gehigarri berriekin, legamia hobetzen duen ore ama erabilita. Baita Arabako irina ere”, azaldu du.
Ostalaritzaren sektorea hezteko moduari dagokionez, arabarrak adierazi du produktu hobe baten aldeko apustua egitea falta dela, jatetxe gehienek era industrialean egindako ogia eskaintzea aukeratzen baitute. “Guk gutxi egiten dugu lan ostalaritzarekin, baina esperientziak erakutsi digu gurekin geratzen direla artisau ogiaren aldeko apustua egiten duten jatetxeak”. Hala, Oribek azken mezua eman du: “Ostalaritzaren aliatuak gara eta ostalariak zorrotzagoak izan beharko lirateke”.
